Luk 12 | MMX | STEP | Ap mo laaleng buaang nedi limixin diga vot buru, la diga umsu aleng; kuren la diga epas gat; la ne Iesu ga vaase avot ti luvuttadi loklok ka anasa ren keretna, “Mina lok tatao avukat nimi basinge laiis at lubung Parisi. Di xarang nedi xa.

Luke 12

Lavapaase Mumu Laxaxarang At Lubung Parisi

(Mt 10:26-27)

1 Ap mo laaleng buaang nedi limixin diga vot buru, la diga umsu aleng; kuren la diga epas gat; la ne Iesu ga vaase avot ti luvuttadi loklok ka anasa ren keretna, “Mina lok tatao avukat nimi basinge laiis ^{▼▼Laiis i ru katling leveloklox ase at lubung Parisi mi lubung Sadiusi.} at lubung Parisi. Di xarang nedi xa. 2 Do lavanga salai limixin dina sibo pe i, nom i naba xis asuvos; la levendoxoma alipe, nom i limixin dibaklen axav i. 3 Mo levelinga mina tong i at lamain, limixin diba ronga i at laxangking tubu; mo levelinga nemi mi vaase nemnem min to at lenbaalung at luvuttadi to xeneng at laraugu vipi pe, nom diba xup aonon min to mavana at lavatlak gu.”

Nege Mo Xusu Mina Marat Teren

(Mt 10:28-31)

4 La ne Iesu ga lok tidi xeretna, “Larapen tangas tarak! A tong i rinimi, nemen mita marat atnedi di sev amet labantuxu, ketla melemu ren kopmen di noxo epovo ti lok tavanga i lok kapmek aleng ti lorooro atnimi. 5 Ana tong i rinimi do legesa radi mun minak marat teren. Minak marat at ne Moroa, melemu do ira sev amet tara, neni i ruuna bok lololos kusu na lu abeles min uto at lemenemen songsongot. I ruturun tinotno. A tong i rinimi do minak marat kusuk mun at ne Moroa. 6 Luunun at lavalimo pixa legepu peni mene, ketla kopmen teta atdi ne Moroa naba domampe i. 7 La kerepmo ne Moroa im doma mumu amisik nimi, ikleklen bok leexes at lengkabinim at lempatlak atnimi. Nemen mita marat mila luunun atnimi at lemeren ne Moroa i silok ti luunun at lavapixa.

8 A tong tuturun i rinimi; do nege i tong asu i do neni atarak to melamgo at limixin axap, nenia, Laradi Mevana, anaba tong box i do neni atarak to melamgo at lubung angelo at ne Moroa. 9 Ket do nege i tong i do i xopara ia ro melamgo at limixin la i lok do neni kopmen atarak, nenia, Laradi Mevana, anaba sok tixirixes box i ro melamgo at lubung angelo at ne Moroa. 10 Do tara na tong toxolinga bilinga mumu ia, Laradi Mevana, i epovo do ne Moroa naba doxoma xepe nom laxakapmek teren; ketla do nege i tong lempanga i lok kapmek mumu Loroonan Kaala, ne Moroa noxo doxoma xepe nom laxakapmek teren.

11 Do dina song araba nimi uto at laraugu singising kusu dina lok li nimi at lavapaase, kopla to melamgo at luvuttadi silok kopla to melamgo at luvuttadi amgomgo, nemen mita bulu do miba vaase pe nimi xereva xopla lavanga salai miba tong i; 12 mila Loroonan Kaala naba lox ase nimi mi levelinga ap mo mene loxonaleng la miba vaase asu i.”

Lavapaase Poovo At Laradi Gang Tangku Pavaa Lapnovos Teren

13 Lara laradi ro xantubu atnedi nom limixin ga lok ti ne Iesu, “Leeme loklox ase, una tong i ri netak kusu na episa lapnovos ne temen nama’ ga met basinge i xantubu atnama’.”

14 Iesu ga vorang i rin keretna, “Leeme, kopmen tara ga raba ia mi levelinga mumuat kusu ana ronga linga, kopla ana epes lempanga kantubu atnumu?” 15 La ni ga vaase rinedi axap, “Mina reven avukat, la mina lok tatao avukat nimi basinge lempanga at na lorooro; mila lorooro ruturun ti laradi kopmen dina lok ka i at na lavatkangka, keke i do neni ip novos aleng.”

16 Melemu ne Iesu ga tong asu lara lavapaase poovo ridi xeretna, “Lara laradi gap novos, ga ruuna loxongkangka mi laraamang gak lok teren; la nom lempanga neni gatlo li i ga visik levempeven una avukat. 17 La ni ga lok keretna, ‘Axo ruuna toxot kusu ri lok li na lempanga. Aba lok lavanga salai?’

18 La ni ga lok keretna, ‘Anaba lox i xeretna; aba ut asi laraugu lili luxa rak la ana lok taraugu silok, la aba lok li lempeven una rak go la lentaba lempanga vetpes bok. 19 La melemu aba lok keretna. Ara ruuna vam lempanga nunuan, i epovo ria at laxanmaares solo. A ruuna ka vam lorooro nunuan, ana anan, ana inin, la ana momo!’

20 Ketla ne Moroa ga lok tin, ‘Nu laradi baulang! Lingina mun at laxanimin uba met; la nenu noxo lok kaka nom lempanga u lok do uba gagas li i ru.”

21 La ne Iesu ga lok bok, “Anai i lok ngan nedi di lili laxampanga solo kusu ridi, ketla to at lemeren ne Moroa kopmen di, dinap novos.”

Nemen Mita Bulu Mu Lempanga Anan La Lempanga Singsiga

(Mt 6:25-34)

22 La ne Iesu ga lok ti luvuttadi loklok ka anasa ren keretna, “La kerepmo a tong i rinimi do nemen mita bulu mu leveluxa mik pakes tin kusu miba rooro, kopla mumu levesingsiga mik pakes tin kusu ri etara. 23 Lorooro i silok aleng ti leveluxa, la labantuxu i silok aleng ti levesingsiga. 24 Mina ven lavapixa; dixotlotlo tevempeven una, la dina lili buru leveluxa; dixo ruuna taraugu kopla tengkot lili. Ketla ne Moroa im taba di! Moroa im doma i do nemi mi silok aleng ti lavapixa. 25 Ua lara atnimi i epovo xusu na nemen at tentaba tenmaares bok do ni na doma mu solo i? 26 Mo do mixo epovo kusu mina lok na lavanga lixilik, nemen mita doma mu solo i, kusu mina ruuna ka lempanga at na lorooro.

27 Mina ven lempatko di susu; dixo gugu la kopmen dinak lok tevesingsiga ridi. Ketla a tong i rinimi do ne Solomon, gap novos aleng, ketla levesingsiga ren goxopmen goxom games ngan i na lempatko. 28 Ne Moroa axa ik paxasiga na lempatko, i ngan lempivilis mo i nemen de lingina, la kantamak dina rin asonao i to at laxao. Kereva, Moroa ixo epovo xusu na taba nimi mi levesingsiga? Nemi limixin, lunuunu atnemi i lixilik aleng! 29 Kuren la nemen nimi mita bulu la mina doma i do miba an lavanga salai la mina in lavanga salai. 30 Limixin axap at na lavatbung menemen kopok di doma mu amisix i na lempanga. Ketla ne Temen nimi iklen i do nemi mik pakes ti na lempanga. 31 Nemen mita doma solo ri na, ketla mina ruuna ka avot be Linintoo at ne Moroa, la ne Moroa naba raba ba nimi mi na lempanga.”

Lapnovos To Vana At Laxalibet

(Mt 6:19-21)

32 La ne Iesu ga lok bok, “Limixin tarak, nemen mita marat, mila ne Temen nemi, i momo xusu naba raba nemi mi Linintoo ren. 33 Mina sesep mi lempanga atnimi la mina raba lempilas at nom lempanga rinedi limixin banbalo la kerepmo mi noxo doma solo lengkontonom ka atnimi mo ba lok kapmek la lempilas atnimi na sonao, ketla minaba ruuna ka lapnovos tinimi ro vana at laxalibet. 34 Mina lox i xuren mila lorooro axap atnimi naba lok mu lapnovos atnimi.”

Lavapaase Poovo Ti Luvuttadi Gugu Diga Gagas

35 La ne Iesu ga lok bok, “Mina gagas ti lomlong tarak i ngan laradi i etara avarang lisingsiga la lababao ren i ngangao. 36 Kerekngan luvuttadi gugu di ngangais ti leeme silok atdi mo naba vot boro at loklox epot; do neni na vot la nap dipdi, diba suang soso mun lumusaragu rin. 37 Naba lox avukat tinedi na luvuttadi gugu do leeme silok atnedi i long lenget ka di do di tuang, la dia gagas mo do neni imlong! A tong i rinimi, do neni xa naba vaxaera i xusu na gugu ridi, la na lox axis di ukopok la na raba panga anan di. 38 Naba lox avukat tinedi luvuttadi gugu mo do leeme silok atnedi i long lenget ka di, di gagas, mo do neni gi rupot at laxanimin tubu kopla at lerengteng kaxak! 39 La mina xasep at nai! Mo do laradi at loogu iklen loxonaleng laradi xipkip pilo naba vot, neni noxo ke nom laradi xipkip pilo na das beles uto xeneng at loogu ren. 40 La nemi bok mina gagas mila Laradi Mevana naba vot at loxonaleng mi noxo doxoma i do ni naba vot teren.”

Lavapaase Poovo Ri Laradi Gugu Avukat La Laradi Gugu Kapmek

(Mt 24:45-51)

41 Pita ga sue ne Iesu keretna, “Leeme Silok. Kereva, u tong i na lavapaase poovo rinema xusuk mun, kopla u doxoma i do ri limixin axap?”

42 Leeme Silok ga vorang i rin keretna, “Nege mo laradi ruturun la lasaxaruki avukat? Neni mo laradi, leeme silok teren naba lok li i xusu nak lok tatao loogu ren la na raba lavasaxaruki mi lempanga anan tidi at lengkonaleng mokmokso. 43 Naba lox avukat ti mo lasaxaruki, mo do leeme silok teren nabamlong la na long lenget ka i do i lox epovo lugugu ren. 44 A tong tuturun i rinimi do mo leeme silok naba lok li lasaxaruki ren kusu na lok tatao lempanga vipis axap teren. 45 Ket do nom lasaxaruki na lok; ‘Leeme silok tarak mo noxomlong soso.’ La nap sep lentaba lavasaxaruki, lavatlok eburu mi lavakin, la ira anan la ira inin la ira inin tangtangku. 46 Melemu leeme silok nabamlong at tara taaleng lasaxaruki ren ixo doxoma i do ni naba vot teren la at loxonaleng neni xopmen naklen i. Nom leeme silok naba sev asongot aleng nom lasaxaruki, la na lox aonon i uto at lemenemen kusu na nemen eburu minedi xopmen dina nuunu.

47 Lasaxaruki iklen lai leeme silok teren i vara i do ni na lox i, ketla kopmen na lox agagas li i, la kopmen na lok epovo lavavara ren, neni naba lok kaka langsangan losongsongot. 48 Ket lasaxaruki do xopmen naklen lai leeme silok teren i vara i, la i lok lempanga i epovo xusu dina vixis i, leeme silok teren ba sev asongot lixilik mun i. Laradi do ne Moroa i raba i mi lempanga solo, ne Moroa naba sing i xusu na raba amlong bok tempanga solo; la ti laradi ne Moroa i raba solo i mi laxampanga, ne Moroa naba sing i mi taxampanga solo bok.”

Iesu Ga Vot Kusu Ri Lox Aepeseves Limixin

(Mt 10:34-36)

49 Iesu ga lok bok, “Aga vot kusu ana lok li na lavatkangka at laxao; la nia a vara i do nom laxao na bao soso! 50 A ruuna lara lumumuat kusu anap kiv i, la labalak i muat aleng kusu ana lok kaka i se ana lox epovo i! 51 Kereva, mi doxoma i do aga vot kusu ana lok li lumulum at na lavatbung menemen? A tong i rinimi do a goxo vot mi lumulum, ketla mi lixitkis epeseves. 52 I ru ka i lingina loxoetemen do lavalimo nedi diba epeseves, lavantun diba munepen mi legepura, la legepura diba munepen mi lavantun. 53 Luvuttemen laxamdak diba munepen mi laxamdak atdi, la laxamdak diba munepen mi luvuttemen di, la lavakin diba munepen mi laxaalik atdi, la laxaalik diba munepen mi luvutnen di; la loxoenenen, diba emunepen eburu.”

Loklok Ti Reven Kisip Levengkonaleng

(Mt 16:2-3)

54 Iesu ga lok bok ti limixin, “Do nemi mi ven loxontakabu i ru kaxat to at loxot laxangking it lotup e, soso mun mi lok do, larakabu mo naba vot. La i ruturun. 55 La do mi suma lamanman i la boro at laxaludan, nemi mi lok, a lok do nabaplivi mo; la i lok kuren. 56 Nemi lavapen aala! Mi reven lavatbung menemen mi laxalibet la mi epovo mina tong asu na lempanga; tila ba, mixo doxoma xibis lovotpot at Laradi Mevana?”

Mina Lok Lumulum Mi Limixin Munepen

(Mt 5:25-26)

57 Iesu ga lok bok, “Tila mi xopara i do mina mumu asu loklok nunuan la mirak lok li amisik limixin at lavapaase? 58 Mo do taradi na lok li lumumuat mavana atnimi la na lok kaka nimi ri lavapaase, mina lolos kusu mina lox akmokso nom lavapaase eburu min, do nemi move mit pas mu langas, kusu neni noxo vaxaru li nimi ro melamgo at laradi rongtonga linga, la laradi rongtonga linga na song araba nimi uto at laradi rutu mu, la laradi rutu mu na lok li nimi at loxokoxo. 59 A tong tuturun i rinimi do mi noxo epovo xusu miba vas su basinge loxokoxo se do mina un axap pam luunun at nom lavapaase.”